L-Unità tal-Proġetti hija primarjament responsabbli għall-ġestjoni u għall-implimentazzjoni ta’ proġetti u skemi ta’ għajnuna ffinanzjati permezz tal-Fond Ewropew għall-Affarijiet Marittimi u s-Sajd (FEMS), il-Fond Ewropew għall-Affarijiet Marittimi, is-Sajd u l-Akkwakultura (FEMSA) u l-fondi Nazzjonali.

Skemi ta’ Għajnuna ffinanzjati fil-livell Nazzjonali li għadhom għaddejjin u li tlestew reċentement

Skema ta’ Restawr tad-Dgħajjes

L-iskema tinvolvi l-għoti ta’ assistenza finanzjarja lis-sidien tad-dgħajjes irreġistrati bħala MFA u MFB li għandhom waħda mid-dgħajjes tal-injam tradizzjonali Maltin, li huma l-Firilla, il-Frejgatina, il-Kajjik u l-Luzzu. L-implimentazzjoni ta’ din l-iskema tqieset neċessarja mid-DFA minħabba li l-ispejjeż tal-manutenzjoni tad-dgħajjes tal-injam huma sostanzjalment ogħla minn dawk assoċjati mad-dgħajjes magħmula mill-fiberglass. L-appoġġ mogħti bħala parti mill-iskema jista’ jitqies bħala investiment dirett lejn is-sostenibbiltà u lejn il-preservazzjoni kulturali tal-flotta tas-sajd tal-injam tradizzjonali Maltija.

Skema ta’ Inċentivi għas-Sajd Sostenibbli

Dan l-aħħar, id-DFA beda l-implimentazzjoni ta’ skema li tfittex li tippromwovi sajd aktar responsabbli u għarfien tal-impatti negattivi tal-prattiki attwali. L-għan tal-iskema huwa li tħeġġeġ lis-sajjieda jadottaw miżuri għas-sajd sostenibbli, permezz ta’ sajd selettiv u t-tnaqqis tar-rata tal-magni. Il-metodi u l-irkapti tas-sajd selettivi jimmiraw u jaqbdu organiżmi skont id-daqs jew l-ispeċi waqt l-operazzjoni tas-sajd, li jippermettu li kampjuni mhux fil-mira jiġu evitati jew jinħelsu bla ma ssirilhom ħsara. Barra minn hekk, l-użu ta’ rkaptu tas-sajd bijodegradabbli jnaqqas il-qabdiet mhux mixtieqa u jimminimizza l-impatt negattiv tal-attivitajiet tas-sajd fuq l-ambjent tal-baħar. Barra minn hekk, it-tnaqqis tal-potenza tal-magna jgħin biex tiġi limitata l-emissjoni ta’ ossidi tan-nitroġenu minn magni diżil tal-baħar, fi sforz biex jitnaqqas l-impatt fuq l-ambjent.

Skema ta’ Għajnuna tal-BFT għas-Sajjieda u Skema ta’ Għajnuna Finanzjarja għall-COVID-19

L-għan ta’ dawn l-iskemi ta’ għajnuna finanzjarja kien li jipprovdu appoġġ finanzjarju lis-sidien tal-bastimenti tas-sajd li huma rreġistrati mad-DFA bħala MFA u MFB biex jikkumpensaw għal ftit mit-tnaqqis fil-valur monetarju u fid-domanda għall-ħut u l-prodotti tas-sajd lokali bħala riżultat tal-pandemija globali tal-COVID-19.

Skema ta’ Kumpens Finanzjarju għas-Sajjieda minħabba ż-Żieda fil-Prezzijiet tal-Fjuwil ikkawżata mill-Aggressjoni Russa Kontra l-Ukrajna

Minħabba l-kunflitt bejn ir-Russja u l-Ukrajna, id-DFA ħass il-ħtieġa li jkompli jappoġġa lis-sajjieda minħabba ż-żieda fil-prezzijiet tal-fjuwil ikkawżata mill-gwerra bejn l-Ukrajna u r-Russja. Il-Fondi Nazzjonali ġew allokati sabiex il-Gvern Malti jkun jista’ jintervjeni finanzjarjament biex itaffi l-ispejjeż operatorji mġarrba mis-sajjieda Maltin u Għawdxin waqt li jkunu qed iwettqu xogħolhom.

Proġetti li għadhom għaddejjin u li tlestew dan l-aħħar iffinanzjati mill-Fond Ewropew għall-Affarijiet Marittimi u s-Sajd

Proġetti ta’ Kontroll

F’konformità mal-Artikolu 76 tar-Regolament Nru 508/2014 u mal-programm operazzjonali tal-FEMS għal Malta, l-Unità tal-Proġetti b’kollaborazzjoni mal-Unità għall-Kontroll tas-Sajd, fost attivitajiet oħrajn, bħalissa qed timplimenta l-inizjattivi li ġejjin biex ittejjeb il-kapaċitajiet ta’ monitoraġġ u sorveljanza tad-DFA –

• Ix-Xiri ta’ Dgħajjes li Jintefħu b’Buq Riġidu;
• Ix-Xiri ta’ Pallet Trucks tal-Idejn;
• Ix-Xiri ta’ Kameras Sterjoskopiċi u ta’ Tagħmir Anċillari;
• Ix-Xiri u l-Installazzjoni ta’ Tablets Elettroniċi u ta’ Ġurnali ta’ Abbord Elettroniċi;
• Ix-Xiri ta’ Tagħmir tas-CCTV;
• Ix-Xiri u l-Installazzjoni ta’ Tagħmir tal-VMS;
• Ix-Xiri u l-Installazzjoni ta’ Trackers tal-GPRS;
• It-Tlestija tal-Verifiki u tal-Analiżijiet tal-Ispejjeż u l-Benefiċċji;
• Ix-Xiri ta’ Vetturi Elettriċi;
• Ix-Xiri ta’ Vetturi tal-Ajru Mingħajr Bdot Abbord;
• Ir-Rimborż ta’ Pjanijiet ta’ Eżerċizzju Konġunti u tal-Ivvjaġġar;
• L-Organizzazzjoni ta’ Seminars u Kampanji ta’ Pubbliċità.

Taħriġ għas-Sajjieda

F’dawn l-aħħar snin, id-DFA seta’ jippromwovi ulterjorment kapital uman fis-settur tas-sajd lokali permezz tal-għoti ta’ korsijiet ta’ taħriġ speċjalizzati lis-sajjieda u lill-konjuġi tagħhom. L-għan ewlieni tal-korsijiet ta’ taħriġ kien li jittejjeb l-għarfien fost is-sajjieda dwar is-sikurezza u l-iġjene tal-ikel, is-saħħa u s-sikurezza fuq il-baħar, u taħriġ dwar kif isir l-aħjar użu mit-tagħmir tan-navigazzjoni. Permezz ta’ investiment ta’ madwar EUR 450,000, 363 sajjied ibbenefikaw mit-taħriġ offrut bħala parti minn dan il-proġett.

Skema ta’ Waqfien Temporanju tal-Pixxispad

L-Iskema ta’ Waqfien Temporanju tal-Pixxispad, li tnediet għal tliet snin konsekuttivi, ipprovdiet kumpens finanzjarju lis-sidien tal-bastimenti tas-sajd irreġistrati bħala MFA u MFB li jistadu għall-Pixxispad. L-għan tal-iskema kien li tippromwovi ulterjorment l-irkupru tal-istokkijiet tal-Pixxispad billi testendi l-istaġun magħluq b’xahar addizzjonali. L-iskema pprovdiet kumpens finanzjarju lis-sajjieda li għażlu li ma jmorrux fuq il-baħar matul ix-xahar ta’ Diċembru.

Nesploraw Flimkien it-Teżori tal-Baħar!

Id-Dipartiment tas-Sajd u l-Akkwakultura (DFA) bi sħubija mal-Aġenzija Nazzjonali tal-Litteriżmu (NLA) u mad-Direttorat għall-Programmi ta’ Tagħlim u Assessjar (DLAP) nedew kampanja promozzjonali, bit-titlu Nesploraw Flimkien it-Teżori tal-Baħar! L-ambitu ta’ din il-kampanja kien li jiġu kkomunikati t-tliet (3) messaġġi prinċipali li ġejjin: (i) għarfien tal-istat tal-istokkijiet tal-ħut lokali, (ii) il-konsum sostenibbli tal-ħut u (iii) ir-rwol ta’ kull individwu fl-assistenza għall-isforzi ta’ konservazzjoni. Intużaw diversi mezzi biex ixerrdu l-għanijiet tal-kampanja, inklużi d-distribuzzjoni/ix-xandir ta’ ktieb bl-istampi, fuljetti, posters, folji tal-istikers, reklami televiżivi, reklami fuq ir-radju u reklami fuq il-midja soċjali. Barra minn hekk, ġie organizzat avveniment għall-pubbliku fil-pixxkerija, li kien mifrux fuq tlett ijiem fi tmiem il-ġimgħa, u saru wkoll diversi żjarat fl-iskejjel bħala parti minn din il-kampanja promozzjonali.

Il-Kostruzzjoni u t-Tlestija ta’ Uffiċċju f’Marsaxlokk

F’dawn l-aħħar snin, l-Unità tal-Proġetti lestiet il-kostruzzjoni ta’ uffiċċju tal-ħatt fil-port tas-sajd deżinjat ta’ Marsaxlokk. Dan l-uffiċċju tqies li kien meħtieġ mid-DFA sabiex jiġi ffaċilitat il-ħatt l-art tal-ħut fir-reġjun tax-Xlokk tal-Gżejjer Maltin. Barra minn hekk, l-uffiċċju jagħti ċ-ċans lid-DFA jestendi l-aċċessibbiltà tas-servizzi tiegħu għas-sajjieda, bħat-trasferiment tal-bastimenti, ir-reġistrazzjoni tal-irkaptu tas-sajd u l-ġbir tal-liċenzji tas-sajd, permezz tat-tqegħid ta’ uffiċjal tad-DFA fuq il-post.

Inizjattivi Ppjanati

Permezz tal-użu ta’ fondi li tqiegħdu għad-dispożizzjoni tad-DFA minn Fondi Nazzjonali u mill-Fond Ewropew għall-Affarijiet Marittimi, is-Sajd u l-Akkwakultura (FEMSA), l-Unità tal-Proġetti qed tippjana li timplimenta l-inizjattivi li ġejjin fix-xhur li ġejjin

• Programmi ta’ Skambju;
• Korsijiet ta’ Taħriġ għas-Sajjieda;
• Kampanji Promozzjonali biex Jippromwovu l-Konsum Sostenibbli tal-Ħut;
• Ix-Xiri ta’ Tagħmir biex Jittejbu l-Monitoraġġ u l-Kontroll fis-Settur;
• Skemi ta’ Għajnuna biex Jappoġġaw lis-Sajjieda biż-Żieda fl-Ispejjeż Operatorji.

Informazzjoni Utli

Ir-Regolament dwar il-FEMS

Ir-Regolament dwar il-FEMSA

Programm Operazzjonali tal-FEMS għal Malta

Ir-Regolament dwar l-Għajnuna De Minimis fis-Settur tas-Sajd u tal-Akkwakultura